ឈរលើមូលដ្ឋាននេះ កម្ពុជាសម្រេចបាននូវភាពជោគជ័យផ្នែកសេដ្ឋកិច្ចដ៏គួរឱ្យស្ញប់ស្ញែង ដែលរក្សាបាននូវអត្រាកំណើនប្រចាំឆ្នាំជាមធ្យមជាង ៧% មុនពេលការរីករាលដាល នៃជំងឺកូវីដ-១៩។ សន្ទុះនេះនៅតែបន្ត ទោះបីកំពុងប្រឈមនឹងបញ្ហាសកលនានា ជាមួយនឹងកំណើនព្យាករ ៦% ក្នុងឆ្នាំ២០២៤ និង ៦.៣% សម្រាប់ឆ្នាំ២០២៥។ កម្ពុជាក៏ មានបរិយាកាសធុរកិច្ចដែលអាចប៉ាន់ប្រមាណទុកជាមុនបាន ជាមួយនឹងអត្រាអតិផរណា​ដែលអាចគ្រប់គ្រងបាន, ស្ថិរភាពនៃអត្រាប្តូររូបិយបណ្ណបរទេស, និងអត្រានិកម្មភាពទាប។

វិនិយោគិននៅកម្ពុជាអាចចូលទៅកាន់ទីផ្សារអនុតំបន់មេគង្គ ដែលមានប្រជាជនជាង ៣០០ លាននាក់, ទីផ្សារអាស៊ានដែលមានប្រជាជនសរុបជាង ៦៧០ លាននាក់ (២០២៣) និងទីផ្សារភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលមានប្រជាជន ២,៣ ប៊ីលាននាក់ និងផលិតផលក្នុងស្រុកសរុប (ផ.ស.ស.) ​ ២៥,៨ ទ្រីលានដុល្លារ អាម៉េរិក។ លើសពីនេះ កម្ពុជាក៏បានចុះកិច្ចព្រមព្រៀងពាណិជ្ជកម្មសេរី​​ទ្វេភាគីជាមួយប្រទេសចិន កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយជាមួយអេមីរ៉ាត អារ៉ាប់រួម(UAE)។ បន្ថែមលើនេះ ការនាំចេញរបស់កម្ពុជា បានទទួលអត្ថប្រយោជន៍ពីការចូលទៅកាន់ទីផ្សារសហភាពអឺរ៉ុប សហរដ្ឋអាមេរិក និងចក្រភពអង់គ្លេស តាមរយៈការទទួលបានកម្មវិធីអនុគ្រោះពន្ធពាណិជ្ជកម្ម ក្នុងនាមកម្ពុជាជាប្រទេសមានការអភិវឌ្ឍតិចតួច (LDC)។

ជាង ៦០% នៃប្រជាជនកម្ពុជាសរុប មានអាយុក្រោម៣៥ឆ្នាំ។ លើសពីនេះ រាជរដ្ឋាភិបាល បាននិងកំពុងអនុវត្តកម្មវិធីអភិវឌ្ឍជំនាញប្រកបដោយមហិច្ឆតា ដើម្បីផ្តល់ការ បណ្តុះបណ្តាលវិជ្ជាជីវៈ និងបច្ចេកទេសដល់យុវជនប្រមាណ ១,៥ លាននាក់ ដែលមកពីគ្រួសារក្រីក្រ និងងាយរងគ្រោះទូទាំងប្រទេស។ វិនិយោគិននឹងមានភាពងាយស្រួល ក្នុងការជ្រើសរើសទេពកោសល្យវ័យក្មេង និងឧស្សាហ៍ព្យាយាម នៅកម្ពុជា រួមផ្សំនឹងកម្លាំងពលកម្មជំនាញដែលមានការទទួលស្គាល់យ៉ាងទូលំទូលាយ។

សម្រាប់បច្ចេកវិទ្យាឌីជីថលវិញ ការរីកចម្រើនជាលំដាប់ផ្នែកឌីជីថល របស់កម្ពុជាស្ដែងចេញយ៉ាងច្បាស់ និងបាននិងកំពុងធ្វើឱ្យមានការផ្លាស់ប្ដូរក្នុងស្ថាប័នសាធារណៈ អង្គការធុរកិច្ច និងជីវិតរស់នៅរបស់បុគ្គល។ រាជធានីភ្នំពេញ បាត់ដំបង សៀមរាប និងខេត្តជាប់មាត់សមុទ្រនានា ស្ថិតនៅជួរមុខនៃបដិវត្តន៍បច្ចេកវិទ្យានេះ ជាមួយនឹងសេវាកម្មឌីជីថលដែលកំពុងលេចឡើងថ្មីៗក្នុងវិស័យនានា។ សេវាទូរសព្ទ ចល័តនៅកម្ពុជា មានតម្លៃសមរម្យ ហើយអ៊ីនធឺណិតក៏អាចប្រើប្រាស់បានដោយល្បឿនលឿន និងការតភ្ជាប់ដ៏គួរឱ្យជឿទុកចិត្ត។ ជាមួយនឹងការកើនឡើងយ៉ាងឆាប់រហ័ស នៃអត្រាអ្នកប្រើប្រាស់អ៊ិនធឺណិតល្បឿនលឿន ការប្រើប្រាស់ទូរសព្ទចល័តនិងប្រព័ន្ធផ្សព្វផ្សាយសង្គម រាជរដ្ឋាភិបាលកម្ពុជាកំពុងអភិវឌ្ឍយ៉ាងសកម្មនូវភាពត្រៀមខ្លួនរួចជាស្រេច ផ្នែកឌីជីថលរបស់កម្ពុជា និងកំពុងតាក់តែងគោលនយោបាយប្រកបដោយមហិច្ឆតា ដើម្បីប្រែក្លាយកម្ពុជាឈានឆ្ពោះទៅជាប្រទេសសេដ្ឋកិច្ចឌីជីថលក្នុងរយៈពេលវែង។

វិនិយោគិននឹងទទួលបានការលើកទឹកចិត្តផ្នែកពន្ធដ៏អំណោយផល ការធានាការវិនិយោគ និងសាមញ្ញកម្មនីតិវិធីរដ្ឋបាល។ [ចុចទីនេះ] សម្រាប់ព័ត៌មានលម្អិតស្តីពីការលើកទឹកចិត្តផ្នែកពន្ធ។ កម្ពុជា បើកចំហសម្រាប់ភាពជាម្ចាស់ធុរកិច្ចបរទេស និងការបង្វិលដើមទុនទៅបរទេសដោយសេរី។ ជាក់ស្ដែង កម្ពុជាអនុញ្ញាតឱ្យមានកម្មសិទ្ធិបរទេស១០០% ក្នុងវិស័យសំខាន់ៗជាច្រើនលើកលែងតែកម្មសិទ្ធិដីធ្លីប៉ុណ្ណោះ ព្រមទាំងអនុញ្ញាតឱ្យវិនិយោគិនអាចទិញរូបិយបណ្ណបរទេសដោយសេរី និងបង្វិលទៅបរទេសនូវរូបិយបណ្ណ បរទេសទាំងអស់នោះ។ រាជរដ្ឋាភិបាល ប្តេជ្ញាចិត្តយ៉ាងពេញទំហឹងក្នុងការជួយសម្របសម្រួលដល់វិនិយោគិននៅគ្រប់ដំណាក់កាល និងពង្រឹង​កិច្ចសន្ទនា និងភាពជាដៃគូ រវាងរដ្ឋ-ឯកជន។

ទុនវិនិយោគដ៏ច្រើនសន្ធឹកសន្ធាប់ ត្រូវបានប្រើប្រាស់សម្រាប់ការកសាងហេដ្ឋារចនាសម្ព័ន្ធសំខាន់ៗ ដូចជា ផ្លូវល្បឿនលឿន, អាកាសយានដ្ឋានអន្តរជាតិ, មជ្ឈមណ្ឌល ភស្តុភារកម្មចម្រុះ, កំពង់ផែសមុទ្រទឹកជ្រៅ និងបណ្តាញ​ដឹកជញ្ជូនតាម​ផ្លូវ​ទឹក។ ការអភិវឌ្ឍហេដ្ឋារចនាសម្ព័ន្ធអគ្គិសនី ក៏មានការរីកចម្រើនគួរឱ្យកត់សម្គាល់ផងដែរ ដោយអត្រាថ្លៃអគ្គិសនី ធ្លាក់ចុះគួរឱ្យកត់សម្គាល់ និងសមត្ថភាពផលិតកើនឡើង ១៥ដង ក្នុងរយៈពេល ១៥ឆ្នាំចុងក្រោយនេះ។ បន្ថែមលើនេះ តំបន់សេដ្ឋកិច្ចពិសេស (ត.ស.ព.) ជាច្រើន ត្រូវបានបង្កើតឡើងនៅគ្រប់ប៉ូលសេដ្ឋកិច្ចសំខាន់ៗនៅទូទាំងកម្ពុជា ដោយមានការតភ្ជាប់ផ្លូវថ្នល់ ផ្លូវដែក ផ្លូវសមុទ្រ និងផ្លូវអាកាស ទៅកាន់មជ្ឈមណ្ឌលពាណិជ្ជកម្ម អន្តរជាតិសំខាន់ៗ។ រាល់ការវិនិយោគនៅក្នុងតំបន់សេដ្ឋកិច្ចពិសេសណាមួយ នឹងទទួលបានការលើកទឹកចិត្តដូចគ្នាទៅនឹងគម្រោង ដែលវិនិយោគក្រៅតំបន់សេដ្ឋកិច្ចពិសេស ប៉ុន្តែវិនិយោគិននឹងទទួលបានការសម្របសម្រួលផ្នែករដ្ឋបាលប្រសើរជាង រួមផ្សំជាមួយអត្ថប្រយោជន៍នៃឥទ្ធិពល ចង្កោមឧស្សាហកម្មដែលស្ថិតក្នុងតំបន់សេដ្ឋកិច្ច ពិសេសស្រាប់។