បេតិកភណ្ឌវប្បធម៌ដ៏ល្បីលើពិភពលោករបស់ប្រទេសកម្ពុជា ដូចជាប្រាសាទអង្គរវត្ត និងទេសភាពធម្មជាតិដ៏សម្បូរបែបបានបន្តទាក់ទាញភ្ញៀវទេសចររាប់លាននាក់ក្នុងមួយឆ្នាំៗ។ បន្ថែមពីលើភាពទាក់ទាញផ្នែកប្រវត្តិសាស្រ្ត កម្ពុជាផ្តល់នូវសក្តានុពលដ៏ធំសម្បើមសម្រាប់បទពិសោធន៍ទេសចរណ៍ថ្មីៗ រាប់ចាប់ពី ឆ្នេរខ្សាច់សស្អាត និងកោះត្រូពិច រហូតដល់ព្រៃឈើខៀវស្រងាត់ ទឹកជ្រោះ និងជួរភ្នំ។ ការបញ្ចូលគ្នាដ៏សម្បូរបែបនៃធម្មជាតិ និងវប្បធម៌នេះបង្កើតជាសក្តានុពលសម្រាប់ការផលិតផលិតផលទេសចរណ៍ជាច្រើន រួមទាំងទេសចរណ៍ធម្មជាតិ ទេសចរណ៍ផ្សងព្រេង បទពិសោធន៍បេតិកភណ្ឌវប្បធម៌ ទេសចរណ៍បែបសុខុមាលភាព ទេសចរណ៍អាហារ និងទេសចរណ៍កម្សាន្ត។ ការកើនឡើងនៃចំនួនភ្ញៀវទេសចរអន្តរជាតិ និងប្រជាជនដែលមានប្រាក់ចំណូលមធ្យម កំពុងជំរុញតម្រូវការសម្រាប់សេវាកម្មបដិសណ្ឋារកិច្ច និងសេវាកម្មសម្រាប់ជីវិតប្រចាំថ្ងៃ ប្រកបដោយគុណភាព។ ការណ៍នេះបង្ហាញពីកាលានុវត្តភាពក្នុងការវិនិយោគលើសណ្ឋាគារប្រណិតៗ រមណីយដ្ឋានប៊ូទិក បទពិសោធន៍នៃការទទួលទានអាហារបែបប្រណិត កន្លែងកម្សាន្ត សួនទឹក និងការលក់រាយលំដាប់ខ្ពស់ ជាពិសេស ផលិតផលដែលផលិតនៅកម្ពុជា ដែលផ្តល់ជូនវិនិយោគិននូវការផ្សារភ្ជាប់ជាមួយវប្បធម៌ដែលកាន់តែជ្រាលជ្រៅ។ លើសពីនេះ ការកើនឡើងនៃតួនាទីរបស់កម្ពុជាជាម្ចាស់ផ្ទះសម្រាប់ព្រឹត្តិការណ៍សំខាន់ៗក្នុងតំបន់ និងអន្តរជាតិ បង្ហាញពីសក្តានុពលដែលកំពុងរីកចម្រើនសម្រាប់ការវិនិយោគលើវិស័យទេសចរណ៍បែបប្រជុំ សន្និសីទ និងពិព័រណ៍ (ម៉ាយ)។