បច្ចុប្បន្ននេះ កម្ពុជានៅតែឈរជើងជាមជ្ឈមណ្ឌល​ប្រមូលផ្ដុំផលិតកម្មកាត់ដេរ និងវាយនភណ្ឌដ៏សំខាន់មួយ ក្នុងតំបន់​អាស៊ីអាគ្នេយ៍។ យោងតាមអង្គការពាណិជ្ជកម្មពិភពលោក នៅឆ្នាំ២០២៣ កម្ពុជាគឺជាប្រទេសនាំចេញផលិតផលវាយនភណ្ឌធំជាងគេលំដាប់ទី៨ ដោយមានកម្មករនិយោជិតសរុបជាង ៩សែននាក់។ ដើម្បីបន្តពង្រឹងវិស័យនេះ រាជរដ្ឋាភិបាលកម្ពុជា​បានដាក់ចេញនូវ “យុទ្ធសាស្រ្តអភិវឌ្ឍន៍វិស័យសម្លៀកបំពាក់ ផលិតស្បែកជើង និងកាបូបកម្ពុជា ២០២២-២០២៧” និង “ផែនទីបរិវត្តកម្មឧស្សាហកម្មវាយនភ័ណ្ឌ និងសម្លៀកបំពាក់កម្ពុជា ឆ្នាំ២០២៣-២០២៧” ដែលមានគោលបំណងប្រែក្លាយវិស័យនេះទៅជាវិស័យឧស្សាហកម្មដែលមានតម្លៃបន្ថែមខ្ពស់ ប្រកបដោយចីរភាពបរិស្ថាន និងភាពធន់។ គំនិតផ្ដួចផ្ដើមទាំងនេះ មានគោលបំណងប្រែក្លាយវិស័យកាត់ដេររបស់កម្ពុជា ទៅជាវិស័យមួយដែលមានតម្លៃបន្ថែមខ្ពស់ មានភាពធន់ និងមានមេត្រីភាពបរិស្ថាន តាមរយៈការអនុវត្ត​សកម្មភាពអាទិភាពមួយចំនួនដូចជា ការលើកទឹកចិត្តដល់ការវិនិយោគផលិតវត្ថុធាតុដើមនិងធាតុចូលផលិតកម្មក្នុងខ្សែច្រវាក់ផ្គត់ផ្គង់ផលិតផលវាយនភណ្ឌ ជំនួសការនាំចូល, ការជំរុញការប្រើប្រាស់មធ្យោបាយស្វ័យប្រវត្តិកម្មនិងបច្ចេកវិទ្យានវានុវត្តន៍ដើម្បីបង្កើត​ផលិតភាពនិងស័ក្ដិសិទ្ធិភាព ព្រមទាំងការលើកកម្ពស់ផលិតកម្មវាយនភណ្ឌដែលមានមេត្រីភាពបរិស្ថាន ស្របតាមគោលការណ៍ចីរភាព និងដើម្បីទាក់ទាញវិនិយោគិនដែលយកចិត្តទុកដាក់ខ្ពស់លើបរិស្ថាន។