គ.វ.ក./ក.អ.ក. ប្ដេជ្ញាផ្ដល់សេវាជូនវិនិយោគិនឱ្យបានទាន់ពេលវេលា ប្រកបដោយប្រសិទ្ធភាព ដើម្បីគាំទ្រឱ្យ​ គម្រោងវិនិយោគអាចដំណើរការទៅបានដោយរលូន។ ក្នុងស្មារតីនេះ គ.វ.ក./ក.អ.ក. ផ្ដល់សេវាថែទាំវិនិយោគដ៏សម្បូរបែប ឆ្លើយតបនឹងតម្រូវការរបស់វិនិយោគិន រួមមាន៖

• សិក្សាវាយតម្លៃស្ថានភាព និងស្វែងយល់ពីវឌ្ឍនភាព តម្រូវការជាក់ស្ដែង និងបញ្ហាប្រឈមរបស់​គម្រោងវិនិយោគ ឬរបស់វិនិយោគិន តាមរយៈការប្រមូលព័ត៌មានដែលផ្ដល់ដោយវិនិយោគិន
• រៀបចំជំនួបរវាងតំណាងក្រសួងស្ថាប័ន និងវិនិយោគពាក់ព័ន្ធ ក្នុងគោលបំណងផ្សព្វផ្សាយ តម្រង់ទិស និងបង្កើនការយល់ដឹងពីបច្ចុប្បន្នភាពនៃការវិវត្តគោលនយោបាយ ការអនុវត្តច្បាប់ លិខិតបទដ្ឋាន​គតិយុត្ត និងនីតិវិធីពាក់ព័ន្ធនឹងការវិនិយោគ
• ពិគ្រោះយោបល់ និងសម្របសម្រួលជាមួយក្រសួងស្ថាប័ន រដ្ឋបាលរាជធានី ខេត្ត មន្ទីរ និងអង្គភាពពាក់ព័ន្ធ ដើម្បីទទួលយកនូវការយល់ព្រម ការអនុញ្ញាត អាជ្ញាបណ្ណ លិខិតអនុញ្ញាត ឬបញ្ជិកានានា និងទិដ្ឋាការចេញចូល និងស្នាក់នៅរបស់វិនិយោគិន
• រៀបចំកម្មវិធីផ្គូផ្គងវិនិយោគិនទាំងក្នុងប្រទេសនិងបរទេស សំដៅលើកកម្ពស់ការធ្វើសន្ធានកម្មខ្សែច្រវាក់ផ្គត់ផ្គង់ក្នុងស្រុក
• រៀបចំជំនួបរវាងតំណាងក្រសួង ស្ថាប័ន រដ្ឋបាលរាជធានី ខេត្ត មន្ទីរ និងអង្គភាព និងវិនិយោគិន​ពាក់ព័ន្ធ ក្នុងគោលបំណងផ្សព្វផ្សាយតម្រង់ទិស និងបង្កើនការយល់ដឹងពីការរៀបចំប្រព័ន្ធទិន្នន័យសម្រាប់​បម្រើឱ្យការធ្វើសន្ធានកម្មខ្សែច្រវាក់ផ្គត់ផ្គង់ក្នុងស្រុក និងការផ្ដល់សេវាថែទាំវិនិយោគទូទៅ
• សម្របសម្រួលជាមួយគម្រោងវិនិយោគដែលមានស្រាប់ ដើម្បីជំរុញការទាក់ទាញក្រុមហ៊ុនផ្គត់ផ្គង់​ធាតុចូលផលិតកម្មរបស់គម្រោងវិនិយោគទាំងនោះមកវិនិយោគនៅកម្ពុជា ក្នុងទិសដៅធ្វើឱ្យកាន់តែស៊ីជម្រៅនូវសន្ធានកម្មឧស្សាហកម្មប្រតិគមន៍ និងឧស្សាហកម្មអនុគមន៍
• ពិគ្រោះយោបល់លើការស្វែងរកទីតាំងយុទ្ធសាស្ត្រ និងសក្ដានុពលសម្រាប់គម្រោងវិនិយោគ ឬការ​ពង្រីកគម្រោងវិនិយោគដែលអាចតភ្ជាប់ទៅនឹងប៉ូលសេដ្ឋកិច្ច និងច្រករបៀងសេដ្ឋកិច្ចសំខាន់ៗនៅក្នុងប្រទេសកម្ពុជា អនុតំបន់ទន្លេមេគង្គ និងតំបន់អាស៊ាន
• ពិគ្រោះយោបល់លើការអភិវឌ្ឍធនធានមនុស្ស ការស្រាវជ្រាវនិងអភិវឌ្ឍន៍ និងនវានុវត្តន៍
• សម្របសម្រួលជាមួយតួអង្គពាក់ព័ន្ធលើការគាំទ្រហិរញ្ញវត្ថុដល់វិនិយោគិន
• ពិគ្រោះយោបល់ជាមួយវិនិយោគិនលើបញ្ហាប្រឈមនានា និងស្វែងរកលទ្ធភាពផ្ដល់ជាដំណោះស្រាយ ដើម្បីទប់ស្កាត់វិវាទវិនិយោគដែលអាចកើតឡើងជាយថាហេតុ
• ផ្ដល់ការពិគ្រោះយោបល់លើយន្តការដោះស្រាយវិវាទដែលកើតចេញពីការអនុវត្តគម្រោងវិនិយោគ ស្របមាត្រា៣៦ នៃច្បាប់ស្ដីពីវិនិយោគនៃព្រះរាជាណាចក្រកម្ពុជា។