ការកើនឡើងនៃនគរូបនីយកម្ម និងចំនួនប្រជាជនដែលគិតគូរពីសុខភាព បាននិងកំពុងជំរុញឱ្យមានការកើនឡើងនូវតម្រូវការសម្រាប់កង់ និងគ្រឿងបង្គុំដែលមានគុណភាពនៅទូទាំងប្រទេសកម្ពុជា និងតំបន់ទាំងមូល។ មនុស្សកាន់តែច្រើនបាននិងកំពុងជ្រើសរើសកង់ជាមធ្យោបាយធ្វើដំណើរប្រចាំថ្ងៃ លំហាត់ប្រាណ និងការរស់នៅប្រកបដោយមេត្រីភាពផ្នែកបរិស្ថាន ដែលការណ៍នេះបាននិងកំពុងប្រែក្លាយឧស្សាហកម្មនេះទៅជាទីផ្សារដ៏រស់រវើក និងមានកំណើនខ្ពស់។ ក្នុងបរិការណ៍នេះ កម្ពុជាផ្តល់នូវកាលានុវត្តភាពវិនិយោគដ៏គួរឱ្យទាក់ទាញក្នុងការផលិត និងការផ្គុំដំឡើងកង់ និងគ្រឿងបង្គុំ។ ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនអន្តរជាតិធំៗជាច្រើនបានសម្រេចចិត្តធ្វើប្រតិបត្តិការក្នុងប្រទេសកម្ពុជា ដែលធ្វើឱ្យកម្ពុជាក្លាយជាប្រទេសនាំចេញកង់ឈានមុខគេមួយក្នុងតំបន់ និងសកល។ ក្រុមហ៊ុនភាគច្រើនមានប្រតិបត្តិការ នៅក្នុងតំបន់សេដ្ឋកិច្ចពិសេស (SEZs) ជាពិសេសនៅទីក្រុងបាវិតនៃខេត្តស្វាយរៀង ដែលជាទីកន្លែងវិនិយោគិនទទួលបានអត្ថប្រយោជន៍ពីកិច្ចសម្រួលនីតិវិធី ការលើកទឹកចិត្ត និងទីតាំងជាយុទ្ធសាស្រ្តដែលស្ថិតនៅជិតផ្លូវពាណិជ្ជកម្មឆ្លងកាត់ព្រំដែន។ ជាមួយនឹងកម្លាំងពលកម្មដែលមានភាពប្រកួតប្រជែង ការទទួលការអនុគ្រោះផ្នែកពាណិជ្ជកម្ម និងភាពប្រសើរឡើងនៃហេដ្ឋារចនាសម្ព័ន្ធ កម្ពុជាកាន់តែមានភាពទាក់ទាញសម្រាប់ការវិនិយោគក្នុងឧស្សាហកម្មកង់ និងគ្រឿងបង្គុំ។