ទីតាំងយុទ្ធសាស្ត្ររបស់កម្ពុជា និងការពន្លឿនការអភិវឌ្ឍហេដ្ឋារចនាសម្ព័ន្ធ កំពុងប្រែក្លាយកម្ពុជាជាមជ្ឈមណ្ឌលប្រមូលផ្តុំផ្នែកដឹកជញ្ជូនប្រកបដោយភាពប្រកួតប្រជែងនៅក្នុងតំបន់អាស៊ាន។ ច្រករបៀងសេដ្ឋកិច្ចភាគខាងត្បូង (SEC) តភ្ជាប់ទីក្រុងបាងកក រាជធានីភ្នំពេញ និងទីក្រុងហូជីមិញ ដែលអនុញ្ញាតឱ្យពាណិជ្ជកម្មឆ្លងកាត់ព្រំដែនប្រកបដោយប្រសិទ្ធភាព។ កម្ពុជាក៏ស្ថិតនៅចន្លោះកំពង់ផែទឹកជ្រៅធំៗចំនួនពីរផងដែរ គឺកំពង់ផែ Saigon របស់វៀតណាម និងកំពង់ផែ Laem Chabang របស់ប្រទេសថៃ ដែលផ្តល់ជូនអ្នកនាំចេញនូវច្រកជាច្រើនក្នុងការចូលទៅកាន់ទីផ្សារសកល។ ដើម្បីឆ្លើយតបនឹងតម្រូវការសេដ្ឋកិច្ចដែលកំពុងកើនឡើង កម្ពុជាកំពុងផ្តល់អាទិភាពដល់ការធ្វើឱ្យប្រសើរឡើងនូវហេដ្ឋារចនាសម្ព័ន្ធ។ ផ្លូវល្បឿនលឿនភ្នំពេញ-ព្រះសីហនុ ដែលបានបើកដំណើរការក្នុងខែតុលា ឆ្នាំ២០២២ បានកាត់បន្ថយពេលវេលាដឹកជញ្ជូនជិត ៥០%។ ជាមួយគ្នានេះ ការសាងសង់ផ្លូវល្បឿនលឿនភ្នំពេញ-បាវិត ដែលបានចាប់ផ្តើមនៅខែមិថុនា ឆ្នាំ២០២៣ គឺគ្រោងនឹងបញ្ចប់នៅឆ្នាំ២០២៧ខាងមុខ។ ការសិក្សាសមិទ្ធិលទ្ធភាពសម្រាប់ផ្លូវល្បឿនលឿនភ្នំពេញ-សៀមរាប-ប៉ោយប៉ែត ក៏ត្រូវបានបញ្ចប់ផងដែរ។ ទន្ទឹមនេះ កម្ពុជាក៏បាននិងកំពុងពង្រីកសមត្ថភាពកំពង់ផែទឹកជ្រៅរបស់ខ្លួន ដែលមានខ្សែដឹកជញ្ជូនទៀងទាត់តភ្ជាប់ទៅកាន់កំពង់ផែសំខាន់ៗក្នុងតំបន់អាស៊ីអាគ្នេយ៍ និងអាស៊ីខាងកើត និងចូលទៅកាន់ទីផ្សារសហរដ្ឋអាម៉េរិក និងសហភាពអឺរ៉ុប។ ដើម្បីជំរុញបន្ថែមលើការដឹកជញ្ជូនតាមផ្លូវទឹក គម្រោងព្រែកជីកហ្វូណនតេជោ ដែលត្រូវមានទំហំទុនវិនិយោគប្រមាណ ១,៧ពាន់លានដុល្លារអាម៉េរិកនឹងតភ្ជាប់ទន្លេមេគង្គទៅកាន់បណ្តាញដឹកជញ្ជូនរបស់កម្ពុជា។ នៅក្នុងវិស័យដឹកជញ្ជូនតាមផ្លូវអាកាស អាកាសយានដ្ឋានអន្តរជាតិតេជោ ដែលគ្រោងនឹងបើកដំណើរការនៅខែកញ្ញា ឆ្នាំ២០២៥ខាងមុខ និងដែលត្រូវបានកំណត់ថាជាអាកាសយានដ្ឋានដ៏ធំបំផុតមួយរបស់តំបន់អាស៊ីអាគ្នេយ៍ នឹងបង្កើនសមត្ថភាពដឹកទំនិញ និងផ្ទុកអ្នកដំណើរយ៉ាងច្រើនផងដែរ។